Студирање психологија во Австралија
Психологијата е проучување на човековиот ум и однесување и таа е повеќекратна дисциплина која опфаќа многу под-области како што се човечјиот развој, спортот, здравството, клиничкото, социјалното однесување и когнитивните процеси. Ако сте заинтересирани да работите со луѓе и да ги истражувате нивните мисли, чувства и однесувања, кариерата во психологијата е одличен избор.
Постојат многу специјализации во областа на психологијата, но без оглед на тоа кој смер ќе го изберете, ќе го применувате своето стручно знаење за проценка, дијагноза, превенција и лечење на психолошките проблеми.
Квалификуваните психолози се многу барани во Австралија и своите вештини можат да ги искажат во различни области. Постои побарувачка за психолози во консултантски фирми, фирми за истражување на пазарот, маркетинг агенции, универзитети, училишта, болници, судови, полиција, итн.
Стручни програми (VET студии)
На ниво на стручните студии од областа на психологијата се нудат програми како што се Diploma of Counseling, Diploma of Psychology, но понудата не е многу голема, бидејќи психологијата е универзитетска област на студирање, па воглавном студиите од оваа област се нудат на ниво на основни, магистерски и докторски студии.
Основни студии
Основните студии се вовед во вашата кариера како психолог, и овие студии обично траат 4 години. Овие студии во Австралија вклучуваат стекнување теоретско знаење каде ќе ги научите основите на психологијата, но исто така вклучуваат и стекнување практични вештини.
Основните студии за психологија можат да се изучуваат како дел од Bachelor of Arts програмите, каде што сте ја одбрале психологијата како задолжителен предмет, или како специјалистички студии, како што е Bachelor of Psychology, каде што се подготвувате за кариера како психолог и каде студентите понатаму продолжуваат на постдипломски студии од оваа област.
При изборот на основни студии од областа на психологијата, обратете внимание да се акредитирани од страна на APAC (Australian Psychology Accreditation Council). За да бидете регистриран психолог, треба да го продолжите образованието и да запишете постдипломски студии.
Услови за упис се завршено средно образование положен IELTS тест (обично со просечна оценка од 6,5 или 7). Школарината за основните студии од оваа област се движи од 22,000АУД годишно.
Мастер студии
На постдипломските студии се надоградува знаењето стекнато на основните студии и со нивното завршување се добива можност да станете регистриран психолог во Австралија.
Акредитираните постдипломски студии во областа на психологијата можат да се стекнат со запишување на мастер студии (кои обично траат 2 години), а можете да запишете комбинација на мастер и докторски студии (во траење од 4 до 4,5 години). Втората опција вклучува предавања, истражувачка работа и надзор на експерти и ментори.
Во Австралија, постдипломски студии вклучуваат проучување на следниве области: Clinical Neuropsychology, Clinical Psychology, Community Psychology, Counselling Psychology, Educational and Developmental Psychology, Forensic Psychology, Health Psychology, Organizational Psychology and Sport, Exercise Psychology и др.
Условите за упис на основите студии се завршено средно образование (признато од страна на APAC ) и положен IELTS тест (оценката зависи од универзитетот и видот на постдипломските студии на кои се запишувате, но најчесто потребната оценка е 7).
Школарината за мастер студиите се движи од 25.000АУД годишно.
Докторски студии
Завршувањето на докторски студии е највисоко ниво на образование што може да го добиете во Австралија во оваа област. Доколку сте заинтересирани за академска кариера, истражување или сакате да работите како лиценциран советник и клинички психолог, докторските студии се вистинската опција за вас.
Школарините за овие студии се движат од 26 000АУД годишно.
Курс по англиски јазик
Доколку не ја добиете потребната оценка на IELTS тестот, без разлика која студиска програма или образовно ниво сакате да го запишете, можете да запишете пакет студии, бидејќи образовните институции ви нудат можност да запишете курс по англиски јазик пред главните студии како би можеле да ја надополните оценката на IELTS тестот.
Бројот на недели на курсот по англиски јазик зависи од оценката на IELTS тестот и колку ви недостасува до потребната оценка за упис, а обично за секој пола поен што ви недостасува, образовната институција ви дава 10 недели курс по англиски јазик.
