Мастер студии
Австралиските универзитети имаат изградена репутација во целиот свет и привлекуваат студенти на различни академски дисциплини. Австралиското академско опкружување поттикнува иновации, креативност и независност.
Мастер студиите воглавно се нудат на универзитетите. Австралија има 43 универзитети кои нудат мастер програми од различни области и овие студии траат од една до две години.
За било која област на студии да сте заинтересирани, на некој од австралиските универзитети сигурно ќе ја најдете вашата идеална мастер програма. Спектарот на понудата е многу шаренолика, така што ќе бидете во можност да се усовршите во различни области, од природните науки и инженерството, па се до општествените, економските и медицинските науки. Во Австралија, постојат двојни магистерски (double degree) програми дизајнирани да ги комбинираат висококвалитетните теоретски знаења и практичното искуство во две области, со што се зголемува нивото на квалификации и понатаму се олеснува влезот на пазарот на труд.
Академска година
Академската година започнува во март и јули. Исто така, некои универзитети нудат почетокот на студиите и во ноември, но понудата на програми е помала.
Школарина
Школарините за мастер студиите се движат од 20,000AUD до 37,000AUD на годишно ниво. Школарината се плаќа семестрално.
Услови за упис
За да запишете Мастер студии во Австралија потребно е да имате завршени основни студиии и да имате положено некој од меѓународно признатите тестови по англиски јазик (IELTS, TOEFL, CAE..). За овој степен на студии, образовните институции во Австралија обично бараат просечна оценка од 6.5 на IELTS тестот и ниеден од поединечните делови да не биде под 6. Која оценка ви е потребна во голема мера зависи и од областа на студирање, па на пример за упис на студии од областа на медицината, психологијата, образованието итн. е потребна повисока оценка. Имајте во вид дека австралиските образовни институции немаат приемен испит, а нашите дипломи за упис се признати за овој тип на студии и не е потребна нивна нострификација.
Temporary Graduate виза по студирањето
Доколку мастер студиите траат две години, по завршувањето на студиите можете да аплицирате за Temporary Graduate виза под post-study visa стримот и на овој начин можете да добиете можност да работите полно работно време две години по студирањето во Австралија. Оваа виза ви овозможува да стекнете австралиско работно искуство и развој на кариерата.
